ابغي افكار لعيد الميلاد ..

[أتنفس حرية]

قرب عيد ميلاد بنتي ومو عارفه شنو اسوي حبيت اسأل اهل الخبره عن أفكارهم .. شنو اسوي للجهال عشان يستانسون ؟؟ والاكل فكرت بارسلات من قيصر او المنار ( احسن لي بدل ما يتسخ المكان) وخصوصاً المنار عندهم بارسلات على اشكال حلوه للاطفال بس الكيك ما عندهم تنويع فيه كله فروت كيك وجوكليت كيك بس .. سمعت عن ليلو حلو بس ما ادري وين اصير ؟؟؟ شنو الافكار الي يمكن استفيد منها ؟؟

احس روحي مشغوله ومتخربطه وما عندي وقت .. ساعدوني بأفكاركم بليييييييز
لاطنشوني عااااااااااااااااد

[قلم سكر]

احسن شى تسووونه للاطفال قبل الابتداء بعيد الميلاد هو .... تلوين الوجوه .... ترى بيستانسون الاطفال واااجد ولا بينسون.... وبشوفون فرحتهم حتى على اهاليهم ... خاصة اذا عندكم واحد يرسم حلو... بيطلع عجيب
والرسم على الوجوه ما يبيله شغل عدل .... ارسم سبايدر مان على وجه الصبي ... والفتاة فراشه او قلب على الخد ...عاد انت وفنك ... تقدر تبدع رسمات واااجد ....والوان الرسم على الوجوة متوفرة في المكتبات ب 400 فلس واذا تبغى اسبشل ترى فيه اغلى واحلى
ومن الافكار ...انك تسوى مسابقة بيسطة وسهله على اسماء الائمه عليهم السلام وامهاتهم ...وطبعا عليها جوائز
ولا تنسى لكل طفل هديه لمن يحضر عيد الميلاد .... خذ رخيص وقوي
ولا تنسى خل اناشيد لرواديدنا الحلوة قبل ما يجى المعازيم مو بعد ...
واذا عندى افكار باقول ليكم ...

[كرستالا]

سلام ,,

سمعي تقدرين .. أتروحين الأنوار أو فخر البحرين .. وتشترين ليش ألعاب للجهال .. وتحطينهم في الأجياس الصغيرة .. وتفرقين بين هدايا الأولاد والبنات .. يعني البنات يكون في جيسهم مثلا ريشة شعر وستكرز على باربي .. والصبيان سيارة صغيرة وستكرز على سوبرمان .. وتحطين لكلا الجنسين أشياء مشتركة في الجيس .. مثل الصواية والنفاخة والكبوس ..

وإذا عندش وقت وزاغر .. وما تبغين تشترين الأجياس الصغيرة الجاهزة .. سويهم أنتين بروحش .. طهر أفتكر مرة سوت أجياس كانوا حلييوين ..

أنزززين وبعد جيبي ليهم شريط نانسي وشغليه .. يلي بيسمع كلمت أهلوو شو بنألوو .. شاطر شاطر
وسوي للجهال ألعاب .. مثل لعبة الكراسي ما ادري ويش اسمها .. أو ألغاز تقولينها ليهم .. وهم يفكرون في حلها وبعدين تعطينهم هدية للي يجاوب عدل .. يعني هدية بسيطة مثل قلم .. مو تشلخين روحش

أنزين فكرة البارسيلات صراحة أحسن وانظف .. مع أني افضل شكل البوفية .. بس الجهال كساف .. ما يسوى
أني أكل المنار أحين صايرة ما احبه >> جني أني اللي باكل خخخ .. روحي الجميع صاير في شارع البديع
مال واحد من الجماعة .. وبارسيلاتهم فاااااان

أما عن الكيكة .. سويها شي غير معتاد .. يعني كفاية فروت وشويكليت .. سويها على شخصية كارتونية أتحبها بتش ..شفت كيكة على شكل قرصان .. عجيبة ومع انع الكريمة ألوان وأشكال إلا انه الطعم يجننن .. اسم المحل عفر الأوربي في المنامة .. واما عن ليلو فهو بالعدلية .. وعندش بعد صحي الفرندا .. كيكهم حلوو .. بس ما ادري إذا يسوون أشكال بالكيك لو لا


الالالااي صار خاطري اجهز وياش ..

[أتنفس حرية]

شكرا قلم سكر
كريستالا مشكوره على كل الافكار

أنزززين وبعد جيبي ليهم شريط نانسي وشغليه

المشكله بنتي تحب هالشريط وفكرت في هالفكره وتحب بعد اناشيد ch14 بس ما يناسب اغاني واناشيد اسلاميه

روحي الجميع صاير في شارع البديع
مال واحد من الجماعة .. وبارسيلاتهم فاااااان

في وين بالضبط خيو نوريني؟؟

وعندش بعد صحي الفرندا

في وين دا بعد ؟؟ ما عليه اتحمليني شوي

الالالااي صار خاطري اجهز وياش ..

حياش خيو

فكرت في الزينه اولاً طبعا
وثانياً مثل ما قلتي اكياس الهدايا
وثالثا السيدي عن نانسي او اغاني ch14
وبارسلات الاكل والكيكه باقي احددهم من وين
والشي الي احاتيه ثياب بنتي خاطري اسويها مثل الفراشه او شي جذي ..
بس سالفه التلوين (تلوين الوجوه) اخاف من الصبغ يتوسخ المكان منه ..

[كرستالا]

المشكله بنتي تحب هالشريط وفكرت في هالفكره وتحب بعد اناشيد ch14 بس ما يناسب اغاني واناشيد اسلاميه

بس هي مو أغاني ردح مرادح .. ونطنطة .. أغاني لأطفال .. وما أتوقعها حرام موليا

في وين بالضبط خيو نوريني؟؟

في وين دا بعد ؟؟ ما عليه اتحمليني شوي

المشكلة أني أخس وحدة أشرح في الدنيا .. كلش ما أعرف أوصف خخخخ
بس بحاول .. الجميع في الدراز صاير .. من أتدشين الدراز سأليهم عنه ووين موقعه بالضبط >> يازعم شرحت
الفرندا .. فيه بالعدلية وفيه بالبلاد القديم .. اللي بالعدلية عند بنك اتش اس بي سي .. واللي في البلاد صاير بعد على الهاوي اللي جنش راجعة من سترة .. وصوب الريفي مال تصحيح النظر .. ومحطة البترول

أدري شرحي خرطي من الزين خخخخ .. بس إن شاء الله يجي أحد ويشرح أفضل مني

أنزين على الثياب .. بنت خالي في عيد ميلادها لبستها أمها فستان من أكسسريز بنفسجي وكله فراشات ونعووومي حده .. وأخذت ليها جناحين الفراشة وركبتهم من ورا الفستان .. فصاير جنه الجناحين جايين ويا الفستان .. جنها انجل استوت .. وحطت ليها في شعرها أكسسورات على فراشات بعد .. وخلتها اتجود عصا بنفس درجة لون الفسان فيها وردة من فوق

ايي بعد أعرف وحدة .. لبست بتها فستان تفصيل راقي .. وخلت بتها تحمل دمية .. وهالدمية لابسة نفس ثياب بتها موديلا وخلقا .. حركة يازعم .. بس عفر مُكلفة الحركة .. لأنش بتسوين فستانين بقيمة مرتفعة .. وواحد منهم بتخفقينه !!

[مروم]

اذا ما تبين عوار راس سويه في جسميز ولا واحد من هالمطاعم، عندهم هم اوفرات اختاري اللي يناسبش والتكلفه للاكل بتكون على قد اللي انصرف يعني بدل ما تاخذين اكثر من العدد او اقل... عادة اول ما يدخلون يسالونهم شنو الوجبات اللي يحبونها ويسجلون عندهم

والكيك ممكن تاخذين من مكان ثاني وتخلينه عندهم وتقدرين تسوين هدايا الجهال او تضيفين اي فقرة للبرنامج ...

غير هذا ان في ساحة اللعب الموجوده في المكان يستفيدون منها الجهال في اللعب، وودي الاشرطه اللي تبينها وعندهم بعد تصوير فيديو

عن عوار الراس في التنظيف والمحاتاة ..

إلا اذا تبين تسوينها في البيت او مكان ثاني

جناحات الفراشه تحصلين في الانوار

[raneen]

اممممم بحط ليش بعض من المسابقات او الالعاب الي تصلح للكبار او الصغار ( ممكن تكون قديمه )

قصصات من ورق تكتب فيها اسماء .. والي يطلع ليه اسم صاحبة العيد ميلاد ليه هدية ..

قصصات من ورق .. فيها اعداد والي يطلع لي عمر الي عيدميلاده ليه هديه ..

ممكن تسوين بعد لعبة الشي الي ملفوف وعلى موسيقى او شي يدور بين الاطفال او الي توقف عند الموسيقى يفتح الجلاده او حتى ممكن لفة بجريده .. وفي الاخير الي يوصل له ويفتحه هو الي بيفوز فيه ..

ممكن بعد قصصات من ورق فيها .. اعمل صوت قطه .. اذكر 5 اسماء بحرف معين .. مثل دور(اي دور كوميدي مثلاً ) .. او اي شي يكتب في ورق ويسحب الطفل ويقوم بعمل ماهو مكتوب في الورقه ..

ممكن ايضاً .. عمل لست اشياء تنوجد في البيت وسهل الحصول عليها من الحاضرين .. والي يقدر يجمع اكبر قدر من الاشياء المذكور هو الفايز ..

ممكن مثل ما قالت كرستالا لعبة الكراسي اذا مافي كراسي مساند ..

ما ادري في وين شفت لعبة الحية والدرج كبيره .. تنفرش على الارض يعني ويقدرون الجهال يوقفون عليها ..

مشابيص الثياب بعد يسون بيهم لعبة بس اني ناسيتنها ..

ممكن ارجع اضيف اذا ذكرت شي ..

[طاحونة]

كرستالا عفية على هالشرح المفيد

مخبز الجميع اذا جاية من جهة دوار القدم تاخذين دوار الدراز يمين وتمشين شوي على يدج اليمين صاير قباله ماتم او مضيف اسمه الزهراء ما يضيع بتاتا ...

[هديل المنامة]

عادة في اعياد ميلاد اولاد العائلة الكريمة ان نوفر لهم مجموعة كبيرة من الالوان و رسومات مطبوعة علشان التلوين ونخلي الجهال يلتهون فيها شوي على ما يتجمع الباقيين وفي نفس الوقت نخليها مسابقة لاجمل تلوين يختارها راعي العيد الميلاد


لعبة ثانية ان تطلبين من الاطفال اللي يفهمون شوي يكتبون بخطهم عبارة تهنئة مميزة و تدخليها السحب كمسابقة

لعبة الكراسي والبر والبحر اساسية في العيد ميلاد ولا تنسين هداياش الرمزية طبعا

لعبة فرقعة البالونات اللي تنربط في الاقدام هذه مناسبة جدا للصبيان لأنهم ورشين ويموتون في شي اسمه تحدي

وزعي ارقام على كل الحضور وفي نهاية العيد ميلاد اجري سحب عليها والفائز عطيه هديته او بطاقة فيها صورة البنوته ولزقي فيها مبلغ نقدي رمزي


هالسوالف لازم تجهزيها قبل مدة من العيد ميلاد علشان لا تنزحمين و تنجفين عن اي شي لحظتها


العيد ميلاد مو بس أكل ولمة ، خليه يصير فرفشة يحبها الاطفال ويحب حضور بيتش




عيد ميلاد سعيد وكل عام والبنوته بألف خير والعمر كله لها يارب

[قلم سكر]

الوان الرسم على الوجه مثلا اقلام الشمعيه بس اكبر اللى 400 فلس ... وترى الالوان ما توسخ المكان وممكن ازالت الرسمه على الوجه بغسله .

[neeran]

اني بعد عيد ميلاد ولدي 2 / 12
وبسوي ليه حفلة يستانس فيها

بالنسبة للكيكة باخد ليه كيكة من المخبز الكوري
وبودي صورته وهو صوب الأسد حق يطبعونها على الكيكة
تطلع بالضبط بالضبط ومو طبقة شكر خشنة ما تنأكل
بالعكس مثل الشوكولاتة المدهونة تنأكل وحلوة

ام حسام في سار
تسوي كيك اشكال وانواع
على منجة وعلى كرميل وانواع جديدة مبتكرة

[ام عقيل]

سلام عليكم

حسافه جى موضوعكم متأخر اني من كم يوم كان عيد ميلاد ولدي وتحيرت ويش اسوي ليه

قلت اهو توه سنه ما يفهم الى اللعب وسويت ليه كيك وشيء خفيف وما عزمت الا العائله والمقربين كلش بعد..حسافه جت افكاركم متأخره بس ان شاء الله نستفيد منها الى السنه الجايه ان شاء الله

تحياتي

[neeran]

انزين يم عقيل جدي أعدل عندي

لانه اول سنة صدق اول فرحة خصوصا اذا الولد البجر

بس ابو سنة ما يفهم داك الزود حتى الشمعة ما يفهم يطفيها الا يالله

والوحدة لين ياهلها ابو سنة بعدهي شقيانة وياه

اني عن نفسي حتى ما كنت رجعت لحياتي الطبيعية

بعدي كل اشغالي معطلة وهو ماخد كل وقتي

بس اهم شي رحت صورت في الاستوديو وياه للذكرى

وسويت بنفسي كيكة واحتفلت في بيت عمي واستانسنه وبس

وخشيت الافكار والبدايع لسنة الجاية لين الله بلغني

[omfatoom]

تحصلين ثياب تناسب في تويز ار اس في السيف

[راحيل]

هلا خيو انصحش اسوين الكيكه عند ام حسام ابصراحه الكيك الي اتسويه عجيب وعدهم اشكال واجد روحي وشوفي الكتلوج واختاري عدهم اشكال وارناق واني من خطوبتي للحين ما اسوي الا عدهم وساعات حتى لو ماعندي مناسبه واصير خاطري في الكيك اتصل واوصي ليي كيكه وادا تبين رقمه بعطيش اياه